i miss u - kal friends!

終於離開了.

謝謝舊公司一班同事對我多年的包容, 給我的快樂!

最長的一份工作, 不是因為什麼, 只因和你們遇上.

有幾多人能有機會, 在一間公司裡遇上這麼投契的人? 同心協力的去玩, 去fun, 去開心! 可是人總要生存, 前途/錢還是重要的.

"我捨不得您 無奈我要創造未來. 共您普普通通的去愛, 未夠我獨個精彩. 我捨不得您, 無奈我有我的未來..."

那天晚上, 真的玩得很高興, 雖然沒齊腳, 只有兩圍朋友, 已經心足.

知道往後的日子, 要重要學習認識, 可是一切在心中, kal友, 青山綠水, 後會有期!

年初一撞正情人節

新年乃打工仔最喜愛節日之一, 而情人節則為天下大多女性所期待.

我知我知, 不少男士對情人節都沒多大好感, 原因多數:

(i) 無啦啦又要諗節目諗禮物, 煩
(ii) 訂檯食飯又貴又唔抵, 去茶餐廳大x樂又怕被人鬧
(ii) 平時買扎花幾舊水之嘛, 情人節點解貴幾倍
(iii) 整色整水, 唔慶祝唔得想friend更加唔得

有道理, 不過用另外一個角度睇, 男士們, 其實你地有著數. 諗下, 你有幾何會身痕訂檯帶個女人去食飯買花送禮? (追求中例外)

依家一年一次情人節做足, 其他日子大可以推卸, 舉例:
(i) 生日 - 搵埋佢班朋友或親人齊齊慶祝, 可以扮surprise party又有多些人夾錢, 大膽既可以唔買禮物, 求其響禮物堆中偷件當自己買
(ii) 周年紀念日 - 兩條友你眼望我眼, 求其煮餐飯又過骨
(iii) 聖誕 - 普天同慶, 叫佢同教友去報佳音得, 約埋朋友打邊爐又得, 得o左. 禮物就要睇下你地公司有無交換禮拜或者annual dinner閣下運氣喇

拉上補下, 除笨有精啦, 唔係好蝕入肉.

今年年初一撞正情人節, 對男人簡直是天大喜訊!

已婚既大可以藉拜年為名, 去親友屋企"痴"餐, 唔駛諗節目又有地方食飯; 未婚既可以帶/陪女友返屋企食飯加分, 買盒餅就得, 食完飯夜麻麻最多都係睇場戲; 單身既大條道理唔出街, 零支出; 至於其他既, 則可以麻雀渡日.

善哉善哉.

獨居生涯原是夢

屈指一算, 獨居已經超過十個年頭, 說真, 沒有想像中困難, 除卻錢! (廢話)

由於有朋友幫忙, 從決定 => 找地方 => 議價 => 搬運, 不到一個月. 不過因為資金不足, 只好邊住邊儲蓄. 睡在地上也要買電視; 沒有雪櫃只好先買微波爐; 未有衣櫃只好買個書架; 到買了床架, 但沒錢買床褥...足足二年多, 才像個家.

起初一個人住, 好像獲赦, 每天不是逛街去玩去鬧, 便是呼朋喚友...漸漸接受了一個人過日子, 反而多留在家中, 孤單卻不寂寞. 獨個兒吃早餐逛超市煮飯洗衫換燈泡, 停電不怕黑夜歸也不怕鬼, 養了貓貓後, 夜遊次數相應大減.

只有生病時候最難捱, 發燒下不了床, 口乾想喝水, 劇痛想入醫院, 平日看似簡單的事情, 統統做不來, 一個人躺在床上, 望著天花板, 淚就流下來, 身體與靈魂皆軟弱嘛. 只要接到朋友來電問候或到訪, 就像佛光初照, 眾生得救!

乘虛而入? 別說笑, 感動歸感動, 病愈又一條好漢, 還不是要上班賺錢; 生病雖然可怕, 獨居女人最恐懼的莫過於失業, 當中以銀行存款稀薄者更甚!